Padayon ang mga paningkamot sa gobyerno sa pagpauli sa mga Pilipino nga masiguro ang luwas nga pagbalik sa nasud gikan sa Middle East taliwala sa nagpadayon nga tensyon sa rehiyon.
Sumala ni Department of Migrant Workers (DMW) Secretary Hans Leo Cacdac, 442 ka mga pasahero sakay sa usa ka chartered flight sa gobyerno sa Pilipinas nga mitugpa sa Ninoy Aquino International Airport Terminal 3 gahapong ad;awa, Marso 14, ang luwas nga nakabalik sa nasud. Diin lakip kini sa 435 ka mga hamtong ug pito ka mga bata, nga gibanabana nga 200 kanila mga overseas Filipino worker o OFW.
Kini kabahin sa tibuok tubag sa gobyerno nga gipangulohan sa DMW, Department of Foreign Affairs (DMW), OWWA, DSWD, ug DOH aron masiguro ang kaluwasan sa mga Pilipino sa mga nasud nga naapektuhan sa sitwasyon sa Middle East.
Gipasabot ni Cacdac nga kung ang airspace sirado sa pipila ka mga nasud, ang gobyerno mogamit og mga ruta sa land crossing aron i-evacuate ang mga Pilipino ngadto sa mga lugar diin sila makasakay og mga flight balik sa Pilipinas.
Samtang, sumala ni OWWA Administrator Patricia Yvonne “PY” Caunan, kapin sa 1,000 ka OFW ang nakauli na gikan sa Middle East.
Ang gobyerno naghatag usab og tabang pinansyal sa mga OFW, lakip na ang pagkaon, mga hygiene kits, temporaryong kapuy-an, ug tabang sa transportasyon para sa ilang pagbalik sa mga probinsya.
Laing chartered flight gikan sa Riyadh, Saudi Arabia nga nagdala og kapin sa 300 pa ka mga Pilipino ang gilauman nga moabot ugma, isip kabahin sa nagpadayon nga operasyon sa gobyerno aron masiguro ang luwas nga pagbalik sa mga OFW sa ilang mga pamilya.
