Mibutyag si Department of Education-Central Visayas Regional Director Dr. Salustiano Jimenez, nga ang migawas nga report sa Second Congressional Commission on Education (EDCOM II) sa Central Visayas diin adunay 169,373 ka mga tinun-an sa grades 1-3 ang maglisud og basa, gibase kini sa nakalabayng opening of classes sa S.Y. 2025-2026.
Matud niini nga kung ibase lang sa kinatibuk-ang report sa nasud, ang Central Visayas wala gayud nahimutang sa labing pinakadaghan nga istudyante ang maglisod og basa, inay mas bintaha kini og 10.43% kung ikumpara sa national average nga adunay 55.05%.
Sigon ni Jimenez, nga susihon sa buhatan sa katapusan sa klase, kung aduna bay kalambuan nga nakita sa mga tinun-an human sa pagpahigayon og mga inisyatiba sama sa “Aral Program, Remediation Program ug Tutorial Program”.
Dugang pa niini nga daghan ang mga rason nganung hangtod karon aduna pay mga tinuna-an sa elementarya ang maglisod og basa, pipila sa mga gitudlo niini mao ang sa kadaghan sa distraction ug pagsuspenso sa klase panahon sa sunod-sunod nga kalamidad nga nahitabo sa Rehiyon-7.
Hinungdan nga padayun ang pagpahigayon og inisyatiba sa DepEd alang sa pagpalambo sa pagkat-on og basa sa mga bata bisan anaa sila sa panimalay, lakip usab nga naningkamot alang sa kalambuan ang pipila ka mga buhatan sama sa Department of Social Welfare and Development (DSWD), sa ilang “Tara basa” program ug ang pipila ka ka mga Non-Governmental Organizations og Local Government Units.
Apan gihimug-atan ni Dr. Salustiano Jimenez, nga nagpabiling hagit gihapon sa buhatan ang pagpabasa sa mga bata gumikan sa kompetensiya sa teknolohiya, hinungdan nga mahinungdanon gayud ang hugot nga pagtagad sa mga ginikanan.
Malaumon usab si Jimenez nga sa sunod nga mga katuigan aduna nay makita nga kalambuan sa mga istudyante, hilabina sa paningkamot sa pagpatuman og programa aron mapukan ang problema sa pagpabasa.
