Gipasiugda sa Department of Justice nga ang mga Villar kinahanglan nga manumpa sa ilang mga counter-affidavit atubangan sa prosekusyon bahin sa mga kaso nga ilang giatubang.
Sumala ni Justice Spokesperson Atty. Polo Martinez, ang mga respondents dili mahimong mobaliwala o mosupak sa direktiba sa prosekusyon.
Atol sa bag-ohay lang nga pasiunang imbestigasyon, si Senior Deputy State Prosecutor Peter Ong mihangyo nga sila manumpa kaniya ug dili sa laing prosecutor.
Gipasabot niya nga ang pag-awhag sa mga respondents nga manumpa sa ilang mga counter-affidavit atubangan sa prosekusyon aron malikayan ang pag-usik sa oras sa pag-verify kung kini gikan ba sa usa ka notary public o laing prosecutor.
Mao kini ang hinungdan nga si Justice Spokesperson Martinez miinsistir nga importante ang pagsunod sa mando sa prosekusyon tungod kay mao kini ang gisunod sa hearing sa reklamo.
Lakip sa mga gireklamo mao ang kompanya nga Villar Land Holdings Corporation, Manuel Villar Jr, Cynthia Villar, Cynthia Javarez, Camille Villar, Mark Villar ug uban pa.
Nag-atubang sila og mga reklamo sa market manipulation, insider trading ug misleading disclosures nga gisang-at mismo sa Securities and Exchange Commission sa DOJ.
Bisan pa, giangkon ni Justice Spokesperson Martinez nga walay seryoso nga tulubagon o epekto kung ang mga Villar dili personal nga mopanumpa sa ilang ‘counter-statement’ sa departamento.
Mahimo silang mohangyo nga isumite ang dokumento og sayo o adunay laing tawo nga mopanumpa, apan ang prosekusyon ang modesisyon kung hatagan ba sila niini.
Gitakda sa panel sa mga piskal ang sunod nga petsa alang sa preliminary investigation nga ika-20 sa sunod nga Abril.
