PROVINCE OF CEBU- Nagmando ang Kagamhanang Lalawigan sa Sugbo sa temporaryong pagpaubos sa gipanukot nga terminal fees sa mga public utility vehicles (PUVs) nga naggamit sa Capitol-operated bus terminals sa dakbayan sa Sugbo, isip pamaagi sa pagpaminus sa kalisod nga giatubang sa sektor sa pampublikong transportasyon tungod sa krisis sa krudo ug lana.
Sa pakighinabi sa Bombo Radyo Cebu News Team kang Ahmed Cuizon, ang terminal administrator sa Cebu North and South Bus Terminal nga matod pa gimando ni Governor Pamela Baricuatro ang maong lakang nga sugod kagahapong adlawa sa Miyerkules, Marso 25 hantod Hunyo 24 kay ang mga PUVs nga misulod sa mga terminal kay mas makaminus sa bayran nga terminal fees.
Gidetalye niini nga ang termial fee sa mga bus ug minibus kay gipaminusan gikan sa P250 ngadto na sa P200 per entry. Samtang sa mga V-hires kay gikan sa P200 ngadto sa P150 ug ang mga taxi kay P10 nalang gikan sa P20 per entry.
Gisaysay sa opisyal nga makatabang kini alang sa mga draybers ug operators tungod sa makalilisan na nga presyohan sa gasoline karon panahona.
Gani nagpasabot pa nga tinguha sa gobernadora kung ang iyang kagustohan lang ang matuman kay i-waive na unta niya nag terminal fee sa mga taxi apan nababagan kini tungod kay adunay lagda nga gituman nga gikan sa Cebu Provincial Revenue Code.
Ang tulo ka buwan nga reduction rates sa terminal fees kay ipaubos pa og pagsusi sa mga posibleng epekto niini sa pagdumala sa Kapitolyo sa mga terminal sa probinsya.
Samtang, gipamahayag sab ni Cuizon nga adunay average sa 550 ka bus trips, 60 ka V-hire trips, ug 1,400 taxi trips ang ilang pasilidad diin ang paglaslas sa terminal fees kay makapaminus sab sa makuhang halin sa terminal apan mas dakong tampo gihapon niini ang pagpaminus sa kasakit sa panalapi sa sektor sa transportasyon.
