Girespeto sa House of Representatives ang desisyon sa Korte Suprema nga dili mo-isyu og temporary restraining order (TRO) kalabot sa nagpadayon nga impeachment proceedings.
Sumala ni House Speaker Faustino “Bojie” Dy III, giila sa House ang taas nga awtoridad sa Korte Suprema ug ang mga proseso niini, ug andam nga motuman sa bisan unsang butang nga sakop sa hurisdiksyon sa korte.
Gipasiugda usab ni Speaker Dy nga kung walay bisan unsang legal nga babag, ang House magpadayon sa pagtuman sa mandato niini ubos sa Konstitusyon.
Dugang ni Dy nga ang House Committee on Justice magpadayon sa paghisgot sa butang subay sa Konstitusyon ug sa kasamtangang mga lagda, pinaagi sa usa ka patas, hapsay, ug proseso nga gibase sa ebidensya diin ang tanang partido hatagan og higayon nga madungog.
Sumala ni Dy, kini nagpakita sa hustong balanse tali sa mga institusyon sa gobyerno, diin ang matag sanga nagtuman sa tagsa-tagsa ka mga gimbuhaton nga gilatid sa Konstitusyon.
Kahinumduman nga gimandoan sa Korte Suprema ang House of Representatives, House Committee on Justice, Senado ug uban pa nga isumite ang ilang mga komento sa petisyon nga may kalabotan sa impeachment hearing batok kang Bise Presidente Sara Duterte.
Atol sa En Banc Session sa Korte Suprema nga gipahigayon niadtong Abril 8, nagpagawas kini og mando nga nagmando sa mga respondents nga motubag sulod sa napulo ka adlaw gikan sa pagkadawat sa abiso.
Samtang, gihiusa sa korte ang mga kaso o petisyon nga gisang-at ni Atty. Israelito Torreon, Bise Presidente Sara Duterte ug uban pa batok sa House Justice Committee ug sa Lower House of Congress.
Bisan pa man og mihimo na og mga lakang ang Korte Suprema, wala kini magpasabot nga ang hangyo nga gilakip sa petisyon gitugot na.
