PROVINCE OF CEBU- Personal nga gibisita sa Bombo Radyo Cebu newsteam ang dapit kung diin lumad nga personalidad sa Balamban nga nakahatag og dakong garbo dili lang sa ilang lungsod ug ingun man sa Sugbo, gumikan sa dakong kalampusan ni Cebuana engineer Arianne “Nikki” Jubay Lazaro human siya nalakip kabahin sa Artemis II mission sa NASA.
Subay niini, eksklusibong gihinabi sa Bombo Radyo Cebu ang ig-agaw ni Lazaro nga si Aster Tan Jubay, kinsa Barangay Secretary sa Barangay Aliwanay, Balamban.
Gibutyag ni Jubay, nga kining si Lazaro iya nang giila nga pag-umangkon, ingun man nga gipaambit usab niini nga si Lazaro anaa nagpuyo sa Florida, ug sukad pa pagkabataa niini, mahiligon na kini og star gazing, ug interesado na kabahin sa “space” hinungdan nga banha kini sa pagdumala og sight seeing gamit ang telescope.
Busa, alang kang Jubay, sa kalamposan karon ni Lazaro, garbo sa iyaha isip usa sa mga kabanay niini ug dakong kalipay niya ang kalampusan niini.
Ingun man nga nanghinaot siya nga mag-abot sila puhon.
Samtang sa pikas bahin, eksklusibong gihinabi usab sa Bombo Radyo Cebu ang pusosong apohan ni Lazaro nga si Matilde Sapitula, diin iyang gikabutyag nga nailhan niya ang iyahang apo nga usa ka simple ug buotan nga pagkatao sukad pagkabataa pa ug hangtud nalang nga na minyu.
Dugang niya, daan na usab nga mahiligon og star gazing si Lazaro uban ang iyahag amahan, hinungdan mapasigarbohon siya sa naabtan sa iyahang apo gumikan dili lang kini garbo nila isip pamilya, apan garbo usab sa iyahang lumad nga gipuy-an ug labi sa tanan, sa nasud nga Pilipinas.
Busa, bisan paman nga isip kabanay ni Lazaro, wala nila damha nga ingun ani kalayo og kalapad ang naabot niini.
Si Lazaro, nga nagtrabaho isip Senior Materials Engineer sa Orion Fracture Control Team, kinsa siya ang responsibilidad sa pagsiguro sa kalig-on ug kaluwasan sa spacecraft, lakip na ang mga kritikal nga sistema sama sa Environmental Control and Life Support System.
Sa iyahang kalampusan, gihatagan og espesyal nga pag-ila ang iyang ginikanan nga sila Ethel Jubay Lazaro, nga lumad sa Aliwanay, Balamban, ug Alberto Lazaro, ingon man ang iyang mga apohan nga sila Rogelio “Rolly” Jubay ug Josephine “Bebe” Jubay, nga mitabang sa paghulma sa iyang panaw.
Matod pa sa lokal nga kagamhanan, ang iyang kahusayan ug dedikasyon nagpakita sa kamahinungdanon sa disiplina ug paningkamot sa larangan sa siyensya ug teknolohiya, samtang nagkatampo sa kaluwasan sa mga astronaut ug sa padayon nga pagpalapad sa kaalam sa kawanangan.
Tungod niini, si Lazaro nahimong inspirasyon sa kabatan-onan sa Balamban ug sa ubang dapit, nga nagpamatuod nga ang mga damgo mahimong makab-ot pinaagi sa kugi ug determinasyon.
