Mihimo og seryosong mga alegasyon ang saksi sa impeachment nga si Ramil Madriaga bahin sa giingong balik-balik nga paghatag og dagkong kantidad sa kwarta ngadto sa mga opisyal nga konektado sa Office of the Ombudsman.
Sa iyang gipanumpaang supplemental affidavit, si Madriaga miingon nga lakip sa mga giingong nakadawat sa kwarta mao sila si Samuel Martires ug Assistant Special Prosecutor nga si Ryan Rey Quilala.
Sumala sa iyang pamahayag, ang mga transaksyon giingong gihimo ubos sa direktang mando ni Sara Duterte ug kanhi Presidente nga si Rodrigo Roa Duterte.
Gihulagway ni Madriaga ang usa ka sistema nga iyang gitawag og “drops,” diin ang kwarta gibutang sa mga sakyanan nga giparking sa gitudlo nga mga lugar, ug ang mga yawe gibilin aron malikayan ang direktang kontak.
Matod pa niya, usa sa detalyadong insidente nahitabo niadtong Disyembre 20, 2022.
Giingon niya nga ilang gihatud ang duha ka bag nga naglangkob og kwarta ngadto sa Ombudsman compound, human kini gikuha gikan sa Department of Education Central Office sa Pasig City ug gidala sa iyang balay sa Cainta.
Kung diin, mga alas 8:00 sa buntag, nagtigom ang grupo sa iyang pinuy-anan sa wala pa moadto sa parking area sa Ombudsman.
Pag-abot nila didto, giingong gisunod nila ang direksyon sa guwardiya ug giparking ang sakyanan nga nagdala sa kwarta.
Sumala ni Madriaga, gibiyaan nila ang mga yawe sa sakyanan ibabaw sa ligid—usa ka pamaagi nga ilang giingon nga kasagaran nilang gigamit sa paghatod og dagkong kantidad sa kwarta.
Human sa operasyon, mibiya dayon sila sa maong lugar.
Dugang pa, giangkon usab ni Madriaga nga aduna siyay lahi nga personal nga paghatud og P15 milyon kang Quilala sulod sa opisina sa Ombudsman.
Miingon siya nga ang mga transaksyon kabahin sa usa ka mas dako nga operasyon sa pagbalhin sa kwarta nga iyang gihimo sulod sa daghang mga tuig.
Hangtod karon, ang mga ginganlan nga opisyal wala pa makahatag og opisyal nga pahayag bahin sa maong mga pasangil.
