CENTRAL VISAYAS- Gipalig-on sa Police Regional Office (PRO) 7 ang ilang drone operations human magpahigayon og Showdown Inspection ug Operational Readiness Check sa ilang Remotely Piloted Aircraft System (RPAS) sa Camp Sergio Osmeña Sr. gahapon Abril 14, 2026.
Ang kalihokan kabahin sa gipakusog nga security preparations alang sa umaabot nga ASEAN Summit sa sunod bulan.
Gitambongan kini sa tanang gitudlo nga drone operators sa PRO7 aron susihon ang kahimtang, functionality, ug operational capability sa ilang mga drone nga gamiton sa aerial surveillance ug situational awareness panahon sa international event.
Gipunting sa inspection ang pagsiguro nga ang tanang drone platforms andam na sa misyon, ilabina sa real-time monitoring sa mga ruta nga agian sa mga foreign ug local delegates, turista, ug mga bisita nga moabot sa Central Visayas.
Sumala sa PRO7, pinaagi niini nga inisyatiba, gipakita ang ilang paningkamot sa pag-maximize sa teknolohiya aron mapalig-on ang security coordination ug mapalapdan ang coverage sa mga kritikal nga lugar panahon sa ASEAN Summit.
Si PBGen Redrico A. Maranan, Regional Director sa PRO7, mipasiugda sa kahinungdanon sa hingpit nga paggamit sa available nga assets aron masiguro ang luwas ug hapsay nga pagdumala sa kalihokan alang sa tanang partisipante ug bisita.
