Nadakpan na ang pugante si kanhi Representante Ako Bicol Zaldy Co sa Prague, Czech Republic human giingong misulod sa nasud nga walay hustong mga dokumento, matod ni Presidente Ferdinand Marcos Jr. niadtong Huwebes, Abril 16, 2026.
Si Co kasamtangang gikustodiya sa mga awtoridad sa Czech samtang ang gobyerno sa Pilipinas nakig-alayon aron mohimo og legal nga mga lakang alang sa iyang diha-diha nga pagbalik sa nasud.
Ingon man nga nag-tubang si Co og daghang mga kasong kriminal nga may kalabotan sa giingong korapsyon sa nasudnong budget labi na sa mga proyekto sa imprastraktura.
Nalambigit usab siya sa usa ka kompanya nga nakakuha og bilyon-pesos nga mga kontrata sa gobyerno, lakip ang usa ka flood control project nga nagkantidad og P289 milyon sa Naujan, Oriental Mindoro nga giingong substandard.
Mahinumduman nga si Co nagtago sukad Hulyo 2025 human nabutyag ang giingong mga anomaliya sa paggasto sa pondo sa gobyerno.
Ug sa ulahi, mi-resign sa iyang pwesto sa Kongreso human napakyas sa pagtubag sa mga panawagan nga mobalik sa nasud.
Samtang, gihimakak ni Co ang mga pasangil batok kaniya. Sumala niya, adunay hulga sa iyang kinabuhi ug ang mga kaso nga gisang-at batok kaniya giingong politikal. Giinsistir usab niya nga nakahimo siya og pipila ka mga desisyon sa mga pagsal-ot sa badyet base sa mga mando sa Presidente.
Sa pagkakaron, wala pay eksaktong petsa nga gihatag alang sa ekstradisyon ni Co tungod kay nagpadayon ang mga proseso sa legal aron madala pauli si Co gikan sa Czech Republic.
