Nibutyag ang Philippine National Police (PNP) kabahin sa ilahang kaandam kung ugaling mabutang sa ilahang kustodiya si kanhi Ako Bicol Representative Zaldy Co sa iyang pag-abot sa Pilipinas.
Sumala ni PNP Chief PGen. Jose Melencio Nartatez Jr., nakig-alayon na sila sa mga kaubang ahensya, ilabina ang Department of Foreign Affairs (DFA), alang sa gikinahanglan nga legal ug diplomatikong proseso bahin sa iyang hapit na nga pagbalik sa nasud.
Human niini, gipasalig sa National Police nga ang tanan nga proseso nga ilang himuon mosunod sa kasamtangang mga balaod ug due process.
Mahinumduman nga si Department of the Interior and Local Government (DILG) Secretary Juanito Victor “Jonvic” Remulla miingon usab nga ang PNP direktang mobalhin kang Co aron moagi sa mga pamaagi sa booking ug dokumentasyon sama sa physical examination ug pagkuha og mugshots sa dili pa siya ipresentar sa Sandiganbayan alang sa iyang pagbalik sa warrant of arrest sa korte.
