NAGA CITY,CEBU- Nakabsan sa kinabuhi ang usa ka 23-anyos nga dalaga human mapiit ang iyang ulo sa tailgate sa gisakyang mini dump truck, human sa pagbangga sa laing dump truck sa ilang gisakyan pasado alas 1:00 sa hapon, Abril 18, 2026, sa Brgy. Balirong, City of Naga.
Giila ang biktima nga si Gayle Ubra Olandria, 23 anyos, residente sa Guadalupe, Cebu. Naangol usab ang iyang mga kaubang sakay nga sila Cristene, 20 anyos, ug Maria, 22 anyos, pulos residente sa Brgy. Poblacion, Talisay City.
Sa inisyal nga imbestigasyon, gikan sa Mt. Naupa sa Brgy. Lanas, Naga ang mga biktima diin nag-hiking sila. Samtang padulong na unta sila mopauli, mihangyo sila og sakay sa likod sa mini dump truck nga padulong sa Naga proper, nga gimaneho ni Alexander Yanong Candol, minyo ug residente sa Brgy. Tungkop, Minglanilla.
Apan pag-abot sa nahitaboan, kalit nga midumbol sa likod nga bahin sa mini dump truck ang laing dump truck nga gimaneho ni Raymart Paran Sepada, residente sa Toledo City. Tungod sa kusog nga impact, nalagpot ang mga biktima, ug maoy hinungdan nga napiit ang ulo ni Olandria sa tailgate nga mitultol sa iyang kamatayon.
Sa pagkakaron, gitanggong na sa kapulisan si Sepada ug giandam na ang tukmang kaso batok kaniya.
Samtang, sa laing insidente, nakabsan usab sa kinabuhi ang usa ka 36-anyos nga lalaki human mabangga ang iyang gimanehong motorsiklo sa sementadong koral sa National Highway sa Brgy. South Poblacion, City of Naga, pasado alas 3:30 sa kaadlawon niadtong Domingo, Abril 19, 2026.
Giila ang biktima nga si Ezekiel Habel Sofia, 36 anyos, residente sa San Roque Street, Brgy. Lipata, Minglanilla.
Sumala kang PCapt. Carlos Narca, Deputy Chief sa Naga City Police, kusog ang dagan sa motorsiklo sa biktima samtang nagbiyahe kini subay sa National Highway gikan sa Minglanilla. Pag-abot sa maong dapit, nawagtangan kini og kontrol sa manibela nga mitultol sa pagbangga sa sementadong koral.
Ang biktima nakasinati og grabeng samad sa ulo nga maoy hinungdan sa iyang kamatayon.
