Gipasalig sa Armed Forces of the Philippines (AFP) nga andam kini alang sa bisan unsang “escalation o eventuality” nga mahimong motungha gikan sa China kalabot sa Balikatan Exercises kauban ang Estados Unidos.
Sumala sa tigpamaba sa AFP alang sa West Philippine Sea nga si Rear Admiral Roy Vincent Trinidad, nag-andam ang militar og mga contingency plan ug andam motubag sa bisan unsang hulga sa maritime domain.
Sa bahin sa China, ang tigpamaba sa Chinese Foreign Ministry nga si Guo Jiakun nagpasidaan batok sa mga lakang nga posibleng makadugang sa tensyon, ug mipugos nga ang kooperasyon sa militar dili angay himoong basehan sa pagtarget sa ubang mga nasud.
Bisan pa niini, miingon ang AFP nga dili sila maimpluwensyahan ug magpadayon sa joint exercises uban sa ilang mga kaalyado.
Giingon usab sa mga opisyal nga ang maong mga ehersisyo dili gitumong batok sa bisan unsang nasud.
Moabot sa 17,000 ka mga tropa gikan sa Pilipinas, Estados Unidos, ug uban pang mga nasud ang moapil sa Balikatan Exercises, diin daghang kalihokan ang ipahigayon sa West Philippine Sea.
