Nitumaw ang duha ka sunog sa kalasangan sa Iwate Prefecture, Japan, sugod niadtong Miyerkules, diin ang kalayo mikaylap ngadto sa 1,176 ka ektarya hangtod Biyernes sa buntag (lokal nga oras), hinungdan sa pagbakwit sa kapin sa 1,000 ka mga residente.
Ang unang sunog nahitabo sa distrito sa Kozuchi, lungsod sa Otsuchi, mga alas 1:50 sa hapon. Dali kining mikaylap ug nakaapekto sa pipila ka mga building ug sa duol nga kalasangan.
Pipila ka oras ang milabay, laing sunog ang miulbo sa bukiron nga distrito sa Kirikiri, nga mga 10 kilometros ang gilay-on gikan sa unang insidente.
Tungod sa peligro, ang lokal nga gobyerno nagtambag sa mga residente gikan sa 566 ka panimalay nga mobakwit, ilabi na kadtong nagpuyo duol sa ikaduhang dapit sa sunog.
Bisan pa sa insidente, wala pay gitaho nga namatay o nasamdan.
Ang lokal nga weather observatory kaniadto nagpasidaan sa uga nga kahimtang ug kusog nga hangin, nga mahimong makapasamot sa pagkaylap sa kalayo.
Sumala sa report, usa ka 61-anyos nga residente nga mibakwit uban sa iyang pamilya miingon nga duha ka sunog ang miulbo sa lain-laing lugar, ug gipahayag usab niya ang iyang kabalaka sa kahimtang sa ilang balay.
