Nagpagawas og pasidaan ang Department of Agriculture (DA) batok sa pagkaylap sa sayop nga impormasyon bahin sa Swine Repopulation Project (SRP).
Sumala sa DA, ang SRP usa ka tulo ka tuig nga programa nga nagtumong sa pagpahiuli ug pagpalig-on sa populasyon sa baboy sa nasud human sa kadaot nga gipahinabo sa African Swine Fever (ASF).
Kabahin sa proyekto ang pagtukod og usa ka maayo ug luwas nga sistema sa pagpasanay gikan sa mga source farm ngadto sa mga multiplier ug production farm gamit ang siyentipiko ug bio-secure nga mga pamaagi.
Gipasabot sa ahensya nga ang SRP gilauman nga makatabang sa pagpalig-on sa suplay sa baboy ug pagpakunhod ug pagpalig-on sa presyo sa karne sa lokal nga merkado.
Gidugang sa ahensya nga ang programa usa ka kauban sa kasamtangang mga inisyatibo sama sa kanhing programa sa INSPIRE ug sa kasamtangang Swine Industry Recovery Project (SIRP).
Apil usab sa SRP ang pagpalit og “gilts” o mga batan-ong baboy gikan sa mga accredited breeder farm nga ipang-apod-apod sa mga multiplier farm alang sa pagpadaghan ug pagpasa sa mga benepisyaryo.
Depende sa mga kwalipikasyon, ang usa ka umahan mahimong makadawat og 25 hangtod 2,000 ka baboy.
