Nisang-at og apela ang kampo ni kanhing Presidente Rodrigo Duterte batok sa desisyon sa International Criminal Court nga kumpirmahon ang mga kaso batok kaniya.
Sa 18 ka pahina nga dokumento nga gisumite sa ICC Pre-Trial Chamber I, nangatarungan ang depensa nga nasayop ang korte sa pagtugot nga magpadayon ang kaso, ug ilang gihulagway kini nga “impermissibly flexible” sa pag-frame sa mga kaso.
Sumala sa kampo ni Duterte, ang ebidensya nga gigamit sa pag-apruba sa kaso dili klaro ug posibleng makaapekto sa patas ug hapsay nga paghusay sa kaso.
Si Duterte nag-atubang og tulo ka ihap sa crimes against humanity nga may kalabotan sa gubat batok sa droga, ug sumala sa mga report, anaa siya sa kustodiya sa The Hague sukad Marso 2025.
Samtang, ang ICC Trial Chamber III gimugna usab aron mopadayon sa sunod nga yugto sa pagdungog sa kaso batok kaniya.
