PROVINCE OF CEBU- Hingpit na nga andam ang Probinsya sa Sugbo alang sa umaabot nga ASEAN Leaders’ Summit 2026, samtang gipasalig ang hapsay ug organisadong koordinasyon sa tanang ahensya ug local government units.
Sa pakighinabi sa Bombo Radyo Cebu, gipahibalo ni Ainjeliz Dela Torre-Orong, ang Public Information Officer (PIO) sa Cebu Provincial Capitol, nga bag-ohay lang nagpahigayon og meeting ang Cebu Organizing Committee nga gipanguluhan ni Gov. Pamila ‘Pam’ Baricuatro, diin gisumaryo ang kasamtangang kahimtang sa preparasyon sa probinsya.
Matud niya, positibo ang report sa tanang ahensya ug LGUs, ug anaa na lamang sa “finishing touches” ang kadaghanang preparasyon.
Andam na usab ang probinsya sa pagdawat sa mga bisita, lakip na ang mga advanced delegations nga sugod nang moabot sa Sugbo sa mga mosunod nga adlaw.
Gilauman usab ang pag-abot sa liboan ka security personnel ug law enforcement officers aron masiguro ang seguridad sa summit, diin mokabat sa 20,000 ka mga bisita ug personnel ang anaa sa probinsya sulod sa maong internasyonal nga kalihokan.
Bisan pa sa kadaghan sa mga bisita, gipasalig sa kapitolyo nga hapsay ang koordinasyon sa airport, LGUs, ug national government agencies aron masiguro ang luwas ug organisadong hosting.
Usa sa mga dakong gitutukan mao ang seguridad ug transportasyon, ilabina sa pagbalhin sa mga delegado gikan sa airport padulong sa ilang mga hotel ug sa mga event venues, nga kasagaran anaa sa Mactan area.
Tungod niini, ipatuman ang temporaryong road closures ug traffic management measures sa dihang adunay movement ang mga delegations, isip kabahin sa security protocols.
Nangayo og pasensya ug pagsabot si Orong sa publiko sa posibleng inconvenience sa trapiko, apan gipasiugda nga ang mga lakang alang sa kaluwasan sa mga visiting leaders ug sa kalampusan sa summit.
Samtang giila ang temporaryong epekto niini, gituohan sa kapitolyo nga dako ug malungtaron nga benepisyo sa ekonomiya sa Sugbo.
Matud niya, ang pagbisita sa mga lider ug ilang delegasyon makapadako sa oportunidad sa turismo, negosyo, ug pamuhunan sa probinsya.
Gipunting usab ang papel sa micro, small, and medium enterprises (MSMEs) sa Sugbo, nga ipasundayag ang ilang lokal nga produkto sama sa kape gikan sa Tuburan ug uban pang hinimong-Sugboanon.
Dugang pa, ipakita usab ang talento sa mga Sugboanon pinaagi sa cultural performances, sayaw, ug ubang programa isip pag-abiabi sa mga bisita.
Nanawagan ang kapitolyo sa publiko nga ipadayon ang world-class hospitality sa Sugbo ug ipakita ang mainitong pagdawat sa mga delegado gikan sa nagkalain-laing nasod sa Southeast Asia.
Sumala ni Orong, kini usa ka higayon aron ipakita sa kalibutan ang kultura, kapasidad, ug potensyal sa Sugbo isip world-class destination, ug ang kalampusan sa summit usa ka kadaugan sa tanang Sugboanon ug sa tibuok nasud.
