CEBU,PHILIPPINES- Gilauman nga ma-endorso sa ika-48 nga ASEAN Summit ang tulo ka dagkong dokumento nga magtino sa mga polisiya ug direksyon sa rehiyon, sumala sa Department of Foreign Affairs (DFA).
Sa press briefing sa International Media Center (IMC) sa Dakbayan sa Lapu-Lapu karong Mayo 6, 2026, gipadayag ni DFA Asec. Dominic Xavier Imperial, Deputy Assistant Secretary for ASEAN Affairs ug ASEAN 2026 Spokesperson, nga ang maong mga dokumento nagrepresentar sa mga kritikal nga kasabutan sa rehiyon.
Lakip sa gilauman nga maaprubahan mao ang review protocol sa ASEAN Charter, nga magtimaan sa unang posibleng amendment sukad 2007 ug magbukas sa pultahan alang sa full integration sa Timor-Leste ngadto sa ASEAN.
Sunod mao ang ASEAN Leaders’ Declaration on Maritime Cooperation, nga nagtumong sa pagpalig-on sa kooperasyon sa kadagatan sa rehiyon, lakip ang gisugyot nga ASEAN Coast Guard Forum ug ang pagtukod sa ASEAN Maritime Centre dinhi sa Pilipinas.
Ikatulo mao ang ASEAN Leaders’ Statement sa pagresponde sa krisis sa Middle East, nga naggikan sa duha ka ministerial meetings nga gipahigayon sa Pilipinas niadtong Marso ug Abril.
Gipasiugda usab niini nga prayoridad sa mga lider ang energy security, food security, ug proteksyon sa mga ASEAN nationals.
Dugang pa, nga isip ASEAN chair, padayon nga giduso sa Pilipinas ang temang “Navigating Our Future Together,” lakip ang preparasyon alang sa ika-50 nga anibersaryo sa Treaty of Amity and Cooperation, ang integrasyon sa Timor-Leste, ug ang sitwasyon sa Myanmar.
Kunng diin, si Foreign Affairs Secretary Maria Teresa P. Lazaro nagsilbi usab nga Special Envoy sa ASEAN Chair alang sa Myanmar.
Sa tunga sa nagkalapad nga global nga mga hagit, gipasiugda sa Pilipinas ang kahinungdanon sa ASEAN unity, strategic autonomy, ug mas lig-on nga koordinasyon samtang nagpabiling matinumanon sa international law.
