Giaprobahan sa Senado ang usa ka mosyon nga ibutang si Senador Ronald dela Rosa sa protective custody samtang nag-atubang siya og mga kaso sa International Criminal Court (ICC) niadtong Lunes sa hapon, Mayo 11. //
Ang mosyon gisang-at sa kaubang senador nga si Sen. Rodante Marcoleta nga adunay tumong nga protektahan si dela Rosa samtang iyang gipadayon ang tanang legal nga remedyo nga may kalabotan sa iyang kaso.
Sumala ni Marcoleta, angayan nga panalipdan si dela Rosa samtang nakigbisog siya alang sa iyang mga katungod.
Samtang, gikumpirma usab ni National Bureau of Investigation (NBI) Director Melvin Matibag nga dili na mopadayon ang ahensya sa pag-serve og arrest warrant batok kang Senador Ronald “Bato” dela Rosa isip pagtahod sa resolusyon sa Senado nga ibutang siya ubos sa protective custody sa upper house.
Sumala ni Matibag, usa ka kasabutan ang naabot tali sa Senado ug sa NBI bahin sa insidente sa giingong pagbabag sa senador sulod sa Senado.
Ubos sa kasabutan, ang mga opisyal nga migukod kang dela Rosa ibutang sa kustodiya sa NBI, apan magpabilin gihapon sila sa contempt samtang nagpadayon ang imbestigasyon sa insidente.
Mahinomdoman nga mao kini ang unang higayon nga si dela Rosa nitambong pag-balik sa sesyon sukad pa niadtong Nobyembre 2025, tungod sa mga nikatag nga taho nga ang ICC adunay warrant of arrest batok kaniya kalabot sa kontrobersyal nga war on drugs sa administrasyon ni kanhi Presidente Rodrigo Duterte.
Gani, sa iyahang pagbalik, si dela Rosa miingon nga ang pipila ka mga personahe sa National Bureau of Investigation (NBI) giingong nagbabag kaniya sa pagsulod sa bilding sa Senado, hinungdan nga gimando sa Senado nga ang mga personahe sa NBI i-cite in contempt ug ibutang sa kustodiya sa Balay Balauranan.
Apan, sa susamang adlaw, Mayo 11, gikumpirma sa International Criminal Court (ICC) nga adunay warrant of arrest nga gi-isyu batok kang dela Rosa.
Diin matod pa sa ICC, anaa na kini sa kasamtangang proseso sa pag-unseal sa maong warrant of arrest.
