Klarong nagpahayag si Senador Ronald “Bato” Dela Rosa sa iyang tuyo nga gamiton ang tanang legal nga remedyo aron hagiton ang arrest warrant nga gi-isyu batok kaniya sa International Criminal Court (ICC) kabahin sa imbestigasyon sa drug war.
Ang iyang legal team aktibong nagsunod sa daghang domestic legal nga estratehiya aron babagan ang iyang pag-aresto o pagsurender sa usa ka langyaw nga korte, nga nagtumong sa pagpugong kaniya nga ipadala sa The Hague.
Subay niini, eksklusibong gikab-ot sa Bombo Radyo Cebu news team si Former Senator Antonio “Sonny” Trillanes IV, ug matod ni Trillanes, kung siya ang pagbut-on, pwede buhaton kadtong nahitabo ni Kanhi Presidente Duterte nga gidala sa The Hague, pinaagi sa susamang ICC Warrant.
Busa alang kang Trillanes, kung nahitabo kini kaniadto, nganung dili man mamahimong buhaton ang maong pamaagi sa karon.
Gani, gitino usab niya nga may kalabutan nga balaod kini ang R.A. 1951, diin nag-ingun kini nga kung adunay akusado nga imbestigahan maykalabotan sa Crimes Against Humanity sa usa ka International Tribunal, naghatag kinig kapasidad sa otoridad sa nasud nga mamahimong isurrender ang maong akusado sa International Tribunal.
Dugang pamahayag ni Trillanes, sa maong Republic Act, klaro ug tataw kini hinungdan nga mao kini ang nahimong basehan niadtong pag-aresto ni Kanhi Presidente Duterte, ug giingong wala kini gikuhaan og kabalido sa Korte Suprema.
Busa, ligdong ang baruganan ni Trillanes nga pwede ug mamahimo kaayo nga buhaton sa kasamtangan alang kang dela Rosa, sa susamang nahitabo ni Kanhi Presidente Duterte.
Samtang gitino usab n Trillanes ang giingong legal remedy nga gibuhat sa kampo ni dela Rosa, kung sa higayon nga dili kini makakuha og Temporary Restraining Order (TRO), nagpasabot lang kini nga wala kini gitanyagan sa Korte Suprema og TRO—susama ra usab sa nahitabo kang Duterte kaniadto.
