Gasto sa US sa giyera sa Iran, niabot na og $29-B — Pentagon

Gibanabanang anaa na sa $29 bilyon ang gasto sa Estados Unidos sa nagpadayon nga gubat batok sa Iran, sumala sa usa ka senior nga opisyal sa Pentagon niadtong Martes.

Mas taas kini og $4 bilyon kumpara sa miaging banabana nga $25 bilyon sa miaging bulan.

Apil sa bag-ong ihap ang dugang nga gasto sa pag-ayo ug pag-ilis sa kagamitan, ingon man sa mga operasyon sa militar.

Bisan pa, wala dayon giklaro sa Pentagon kung giunsa nakuha ang kinatibuk-ang $29 bilyon nga figure.

Sa miaging report niadtong Marso, gibanabanang nakaabot na sa dili mokubos sa $11.3 bilyon ang gasto sa unang unom ka adlaw sa gubat nga gipangulohan ni US President Donald Trump.