Pormal nga magtigom ang Senado isip impeachment court sa Mayo 18, 2026 aron sugdan ang pagdungog sa kaso sa impeachment batok kang Bise Presidente Sara Duterte, matod ni Senate President Alan Peter Cayetano.
Sa usa ka sulat ngadto kang House Speaker Faustino Dy III nga gipetsahan og Mayo 14, gikumpirmar ni Cayetano ang pagdawat sa Senado sa articles of impeachment ug gilakip nga dokumento nga gipadala sa House of Representatives niadtong gabii sa Mayo 13.
Sumala ni Cayetano, ang impeachment court magtigom sa alas 3 sa hapon subay sa Senate Rules of Procedure on Impeachment Trials ug sa mandato sa Konstitusyon.
Gimandoan usab ni Cayetano ang Senate Secretariat nga ilakip ang articles of impeachment sa Calendar for Ordinary Business alang sa pormal nga pag-refer sa impeachment court. Ug dugang niini nga ang Senado mopagawas og iskedyul sa pagpakita sa duha ka habig sa umaabot nga mga adlaw.
Bisan pa man og ang impeachment court magtigom sa Mayo 18, si Cayetano miingon nga ang aktuwal nga husay mahimong magsugod sa Hulyo depende sa natukod nga mga pamaagi ug sa gidaghanon sa mga adlaw sa sesyon.
Gipasiugda usab ni Cayetano nga ang Senado mosunod sa kasamtangang balaod ug miingon nga walay paglangan sa proseso sa impeachment.
Sa samang higayon, iyang gihimakak ang espekulasyon nga ang bag-o nga pagbag-o sa liderato sa Senado may kalabutan sa giingong plano nga babagan o i-postpone ang impeachment trial batok kang Duterte.
