Ipadala sa Netherlands ang 24 sa 38 ka Pilipinong tripulante sa MV Hondius human sa pag-ulbo sa hantavirus sa maong cruise ship.
Sumala sa Department of Migrant Workers (DMW), ang tanang 24 ka tripulante nga gikatakdang papaulion mga hotel steward.
Sa higayon nga anaa na sila sa Netherlands, moagi sila sa quarantine period nga hangtod sa unom ka semana.
Samtang, ang 14 pa ka Pilipino, nga mga deck ug engine staff, ang magpabilin sa barko.
Ang barko molawig paingon sa Rotterdam, Netherlands gikan sa Tenerife, Spain diin kini kasamtangang nakaangkla.
Pag-abot sa Rotterdam, i-quarantine usab sila sulod sa unom ka semana.
Sumala ni DMW Sec. Hans Cacdac, kon mahuman na ang quarantine period, ang 38 ka Pilipinong tripulante ipadala na pauli sa Pilipinas.
Miingon si Department of Health (DOH) Sec. Teodoro Herbosa nga ang mga tripulante kinahanglan nga moagi sa quarantine tungod kay ang incubation period alang sa hantavirus mahimong molungtad hangtod sa 45 ka adlaw gikan sa oras sa pagkontak sa impeksyon.
Gitataw sa DOH nga dili na kinahanglan nga ipaubos sa pagsusi ang mga tripulante kon anaa na sila sa Pilipinas.
Gipasalig usab sa kalihim nga ang hantavirus dili moresulta sa usa ka pandemya sama sa COVID-19 tungod kay dili kini dali nga mokatap.
