CEBU CITY- Nagpahayag og dakong garbo ang pageant trainer ni Gazini Ganados nga si Carla Super Soft sa gipakitang performance sa beauty queen sa nagpadayong MGI All Stars competition.
Sa eksklusibong pakighinabi sa Bombo Radyo Cebu, gibutyag ni Carla nga dako ang kalamboan ni Gazini kumpara sa iyang miaging pag-apil sa Miss Universe.
Matud niya, mas andam na karon si Gazini sa pisikal, emosyonal, ug mental nga aspeto alang sa internasyonal nga kompetisyon.
Gipadayag usab ni Super Soft nga tinguha ni Gazini nga “i-redeem” ang iyang kaugalingon human niya mabati nga wala niya napakita ang labing maayong performance sa Miss Universe tungod sa pressure ug kakulang sa support system niadtong higayona.
Sumala kaniya, bisan pa man sa ka-busy ni Gazini, naggahin gihapon kini og panahon alang sa training, lakip na ang mga late-night online coaching sessions.
Dugang pa ni Super Soft, sukad niadtong tuig 2017 iyang nasaksihan ang pagtubo ug paglambo ni Gazini, ilabi na sa iyang communication skills ug stage performance.
Tungod sa natural nga karisma ug lig-on nga stage presence ni Gazini, nagtuo si Super Soft nga dako ang tsansa sa pambato sa nasod nga makasulod sa Top 5 ug posible pang makakuha sa korona.
Gidayeg usab sa trainer ang gipakita ni Gazini sa rap ug performance segments diin iyang gihulagway kini nga puno sa kompiyansa ug nag-overflow nga enerhiya sa entablado.
