Giangkon sa lokal nga gobyerno sa Quezon City nga dakong hagit alang kanila nga matupngan o malabwan ang malampusong pag-host sa Agusan del Sur sa Palarong Pambansa 2026.
Sa usa ka interbyu, gihulagway ni Mayor Joy Belmonte ang pagdumala sa Agusan del Sur sa nasudnong dula nga “amazing” gikan sa pagpangandam hangtod sa pagtapos sa kalihokan.
Matud niya, taas ang sumbanan nga gitakda sa maong probinsya ug lisod kini matupngan.
Opisyal nang gikumpirma sa Department of Education (DepEd) nga ang Quezon City maoy mo-host sa Palarong Pambansa 2027, nga gilauman nga ipahigayon sa Mayo sa sunod tuig.
Kini ang ikaduhang higayon nga mahimong host ang siyudad sukad sa una niini niadtong 1966.
Posibleng gamiton sa Quezon City ang mga dagkong pasilidad sama sa UP Diliman, Amoranto Sports Complex, QC M.I.C.E. Center ug uban pang pampublikong eskwelahan alang sa kompetisyon.
Giingon usab ni Belmonte nga ang lokasyon sa siyudad ug ang koneksyon niini sa lainlaing bahin sa nasud usa ka bentaha sa pagdawat sa liboan ka mga atleta ug delegado.
Tumong usab nila nga makahatag og “champion’s experience” alang sa tanang mga partisipante sa Palarong Pambansa 2027.
