Gipanghimakak sa Armed Forces of the Philippines (AFP) ang mga taho nga ang China nagpahigayon og mga military drill sa West Philippine Sea, ilabina sa Bajo de Masinloc, ug miinsistir nga ang maong pahayag hinimo-himo lang.
Sumala ni Retired Rear Admiral Roy Vincent Trinidad, ang espesyal nga tigpamaba sa AFP alang sa West Philippine Sea, naandan na nga taktika sa China ang pagpagawas og propaganda matag higayon nga ang Pilipinas magpahigayon og mga ehersisyo uban sa mga kaalyado niini.
Gibarugan niini nga wala silay nakitang bisan unsang organisadong lihok, tactical maneuvers, o joint formations sa mga barko sa People’s Liberation Army Navy ug China Coast Guard nga mahimong isipon nga mga military exercise, gawas lang sa presensya sa pipila ka barko sa palibot sa Bajo de Masinloc.
Sa samang higayon, ang AFP, Philippine Coast Guard, ug United States Indo-Pacific Command malampusong nagpahigayon og lima ka adlaw nga Maritime Cooperative Activity gikan niadtong Mayo 26 hangtod 30, 2026 sa maong dapit.
Ang mga kalihokan naglakip sa search and rescue drills, maritime law enforcement training, ug live communication exercises, nga nagtumong sa pagpalig-on sa depensa ug interoperability sa Pilipinas ug US.
Samtang, giangkon sa China nga nagpahigayon kini og mga combat readiness patrol sa Scarborough Shoal isip tubag sa giingong “rights violations” sa rehiyon, apan kusganong gihimakak kini sa AFP ug gipasiugda nga ang publiko dili angay modawat sa maong propaganda nga walay basehan.
