Misaka na ngadto sa 23 ang ihap sa mga nakalas human mahugno ang usa ka siyam ka andana nga edipisyo nga gitukod didto sa Angeles City, Pampanga.
Kini human gikumpirma sa Bureau of Fire Protection (BFP) Central Luzon nga laing duha ka patayng lawas ang narekober gikan sa mga nagun-ob nga semento karong buntaga, taliwala sa nagpadayon nga search and retrieval operations.
Sumala sa BFP Central Luzon, unang nakit-an sa mga responder ang patayng lawas sa ika-22 nga biktima sa Quadrant 2 sa construction site alas 7:21 sa buntag. Pipila ka oras ang milabay, narekober usab ang ika-23 nga biktima alas 9:12 sa buntag.
Sa pagkakaron, wala pa gipagawas ang identidad sa maong mga biktima samtang gipailalom pa kini sa beripikasyon sa Scene of the Crime Operatives (SOCO).
Kahinumduman nga anaa sa 27 ka mga indibidwal ang swerteng naluwas ug daling natabang gikan sa maong trahedya sa mga nangaging adlaw.
Bisan pa man sa mga hagit ug kakulian nga dala sa walay hunong nga pag-ulan, padayon gihapon ang mga otoridad sa pagpangubkob sa mga kagun-oban aron pagsiguro nga makuha ang tanang posibleng biktima nga natabunan sulod sa maong nahugnong edipisyo.
