Nailhan na sa kapulisan ang mga ginikanan sa usa ka fetus nga nadiskobrehan sulod sa basurahan sa Interim Carbon Public Market mga alas 4 sa hapon niadtong Hunyo 10.
Sumala sa pulis nga nagdumala sa imbestigasyon, ang inahan usa ka 22 anyos nga babaye gikan sa Toledo City, samtang ang amahan mao ang iyang 24 anyos nga kapuyo gikan sa Balamban. Pareho silang gikataho nga nagtrabaho isip mga merchandise personnel sa samang establisemento sa merkado.
Matud sa mga awtoridad nga nagtigom pa sila og kompletong impormasyon bahin sa insidente, kay giingung ang babaye gidala dayon sa ospital ug gipailalom sa medikal nga pag-atiman.
Gihulagway sa kapulisan ang kaso nga sensitibo ug nagsalig sila sa scientific and forensic findings isip kabahin sa nagpadayon nga imbestigasyon sa dili pa makaabot sa bisan unsang konklusyon.
Sa pagsulat niini, ang mga awtoridad nagpadayon sa pag-imbestiga sa mga sirkumstansya nga naglibot sa insidente samtang naghulat sa mga resulta sa autopsy sa fetus.
Dugang sa mga kapulisan nga wala pa matino kon tinuyo ba o dili ang nahitabo. Ang resulta sa DNA examination ug CCTV review maoy usa sa mga basihan sa pagdeterminar kon adunay nahitabong tinuyoang pagpalaglag sa gisabak.
Kahinumdoman nakit-an kini sa usa ka tindera sa Carbon Public Market nga si Desiree Sebuano, matud niini nga nakit-an nalang niya ang mismong puya nga gihapinan sa tissue sulod sa basurahan.
