Personal nga gibisita ni Bise Presidente Sara Duterte niadtong Domingo ang mga residente nga naapektuhan sa magnitude 7.8 nga linog nga miigo sa Mindanao aron masusi ang ilang kahimtang ug mga panginahanglan.
Sa usa ka pahayag sa social media, si VP Sara miingon nga una siyang miadto sa Barangay Nuing sa Jose Abad Santos aron personal nga mangumusta sa mga apektadong pamilya ug masiguro nga ang gikinahanglan nga tabang mahatag sa komunidad.
Sumala sa Office of the Vice President (OVP), ang Bise Presidente naghatag usab og tabang sa mga residente nga naapektuhan sa kusog nga pagtay-og.
Human sa pagbisita sa Davao Occidental, si Sara Duterte milahos sa Sarangani Municipal Hospital ug sa usa ka evacuation center sa Barangay Mabila sa Balut Island aron masusi usab ang kahimtang sa mga bakwit ug mga pasyente nga naapektuhan sa kalamidad.
Ingon man nga niabot usab ang Bise Presidente sa Glan, diin nakigkita siya sa mga pamilya nga gibakwit ug temporaryong nagpabilin sa Glan Tent City evacuation site, ug gibisita usab niya ang mga pasyente nga gitambalan sa Philippine Emergency Medical Assistance Team Field Hospital.
