Giklaro sa defense team ni Bise Presidente Sara Duterte alang sa iyang impeachment trial nga nangayo kini og “labing menos 30 ka trial dates” alang sa mga proseso, sukwahi sa pangangkon sa House prosecution panel.
Sa sayo pa, ang bag-ong pribadong piskal ug tigpamaba sa grupo, si Benjamin Tolosa Jr., nangutana sa hangyo sa depensa alang sa 30 ka petsa sa pagdungog, diin nagtumong sa pagpresentar og 97 ka mga saksi. Samtang, ang House prosecution panel nangayo og 62 ka trial dates aron ipresentar ang ilang mga ebidensya ug mga saksi sa impeachment case.
Hinuon taliwa sa wala pagkasinabtanay, ang duha ka grupo nagkauyon sa usa ka butang: ang husay mahimong molapas sa Setyembre 2026.
Giangkon sa House prosecution lead counsel ug Batangas Rep. Gerville Luistro nga ang pagtapos sa trial sa Setyembre daw dili mahimo.
Giuyonan ni Michael Poa, ang tigpamaba sa defense team ni VP Sara ang sentimento ni Luistro, nga nag-ingon, nga uban sa pagtimbang-timbang ni Rep. Luistro, sa iyang panan-aw, ang tulo ka bulan medyo lisod.
Gipasabot usab niya nga dili nila matagna ang dagan sa pagdungog, ug ang timeline magdepende sa gidaghanon sa mga saksi ug sa gidugayon sa direkta ug cross-examination.
Sa pikas bahin, gipahibalo ni Trial Spokesperson Rep. Zia Alonto Adiong nga ang House Prosecution Panel nagpresentar na sa Korte sa sunod-sunod nga presentasyon sa mga ebidensya nga may kalabotan sa mga artikulo sa impeachment atol sa kasamtangang pre-trial conference sa Senado.
Sumala ni Adiong, ang mando mao ang Article 4 (gialegar nga plano sa pagpatay, grabe nga mga hulga ug pag-aghat sa sedisyon), Article 1 (sayop nga paggamit sa confidential funds), Article 3 (bribery ug korapsyon sa Department of Education), ug Article 2 (wala mapasabut nga bahandi, bakak nga mga pahayag ug padayon nga interes sa negosyo).
