Mipakusog sa ilang kampanya batok dengue ang Mandaue City Health Office (CHO) aron masiguro nga kontrolado ug dili mosaka ang mga kaso sa maong sakit karong panahon sa ting-ulan.
Matod pa ni Assistant City Health Officer Dr. Phyllis Bidon, padayon silang nakatala og mga kaso sa dengue karong tuiga apan mas ubos kini kung itandi sa samang panahon niadtong tuig 2025, diin subay sa ilang rekord gikan sa Enero hangtod Hunyo 17, 2026, nakatala ang siyudad og 198 ka kaso sa dengue, nga mas ubos sa 273 ka kaso nga natala sa susamang panahon sa miaging tuig, diin niabot sa kinatibuk-ang 520 ka kaso ang natala sa tibuok tuig 2025.
Gihatagan og gibug-aton ni Bidon nga kasagarang mosaka ang kaso sa dengue kung ting-ulan tungod sa pondo sa tubig nga maoy paboritong puy-an ug pusa-an sa mga lamok, ilabi na ang matang sa Aedes aegypti nga maoy nagdalag virus ug nakumpirmang anaa sa Mandaue. Tungod niini, ang paglikay gihapon ang labing epektibong paagi aron dili matakdan.
Aron mapugngan ang pagkaylap sa sakit, ang kagamhanang lokal pinaagi sa vector management program padayong nangita ug nagwagtang sa mga dapit nga mahimong lutsanan sa mga lamok.
Gipasiugda usab sa CHO ang 4S advocacy diin gipahibawo ngadto sa publiko ang kamahinungdanon sa search and destroy o ang pagpangita ug pagguba sa puy-anan sa lamok, self-protection alang sa pagpanalipod sa kaugalingon, seek early consultation aron sayong makapakonsulta sa doktor, ug support spraying alang sa pagsuporta sa pag-spray sa mga komunidad.
Nanawagan usab si Bidon sa mga ginikanan nga dili langay-langayon ang pagdala sa ilang mga anak sa doktor kung duna nay hilanat o mga simtomas sa dengue aron daling maatiman, tungod kay alang kaniya, kinahanglang magpabiling mabinantayon ang publiko tungod kay anaa pa gihapon ang hulga sa maong sakit labi na karong ting-ulan.
Aron mapalig-on pa ang kampanya, ang Barangay Task Forces for Dengue ug Dengue Brigades aktibong nagtrabaho sa 27 ka mga barangay sa siyudad. Gani, niadtong Hunyo 20, ang mga Barangay Health Workers sa Barangay Labogon nagpahigayon og Dengue Awareness Caravan.
