Nanawagan si Akbayan Party-list Rep. Chel Diokno sa Department of Education (DepEd) nga hatagan og pagtagad ang nagapadayong “kultura sa pagpakahilom” sa mga biktima sa bullying human sa nahitabong pagpamusil sa usa ka tunghaan sa Tacloban City nga nikalas og tulo ka estudyante ug nikaangol sa 20 ka uban pa.
Sumala sa mga taho, giingong nahimong biktima sa bullying ang duha ka menor de edad nga suspek sa maong insidente sulod sa San Jose National High School. Gipasiugda ni Diokno nga kinahanglang magpabiling luwas nga dapit ang mga eskwelahan ug walay luna ang bullying sa mga institusyon sa edukasyon.
Nangayo usab siya og lawom nga imbestigasyon kalabot sa posibleng kakuwang sa seguridad human nakasulod ang armas sa sulod sa tunghaan.
Matod sa magbabalaod, kinahanglang sulbaron ang gamot sa maong kapintasan lakip na ang bullying, mga problema sa panimalay ug internet, ingon man ang mga kuwang sa regulasyon ug pagpatuman sa balaod sa armas.
Dungan niini, giawhag ni Diokno ang DepEd nga mogahin og pondo alang sa pagpalapad sa mga anti-bullying program, sama sa Learner TeleSafe helpline, aron mapalig-on ang proteksyon sa mga magtutungha.
