Gipaahingusgan sa Tagbilaran City Bohol, ang mga lakang sa seguridad pinaagi sa pagpahigayon og security inspection ug assessment survey sa mga tunghaan sulod sa siyudad aron masiguro ang kaluwasan ug kaayohan sa mga estudyante, magtutudlo, ug tanang kawani sa mga eskwelahan.
Ang maong kalihokan nagtumong sa pag-ila ug pagtimbang sa kasamtangang kahimtang sa seguridad sa matag eskwelahan, lakip na ang mga entrada ug exit points, perimeter fences, CCTV systems, security personnel deployment, emergency response procedures, ug uban pang mga pasilidad nga may kalabutan sa kaluwasan sa mga estudyante ug personnel.
Matud ni Police Lieutenant Colonel Christopher Fernandez, Chief of Operations sa Bohol, nga sa wala pay nahitabo nga insidente sa Tacloban, daan nang naningkamot ang sakop sa kapulisan nga mapanghingusgan ang siguridad sa mga tunghaan sa Probinsya.
Dugang pa niini, mas gipakatap pa ang mga sakop sa kapulisan sa mga pribado ug pampublikong tunghaan aron sa paglikay sa susamang insidente.
Pinaagi niini, mas mapalig-on ang koordinasyon tali sa lokal nga kagamhanan, kapulisan, mga administrador sa eskwelahan, ug ubang stakeholders aron mahatagan dayon og solusyon ang mga kahuyang nga posibleng mahimong hulga sa seguridad sa mga tunghaan.
Kauban sa maong inisyatibo ang Bohol Police Provincial Office (BPPO) ug ang local nga kagamhanan sa mga siyudad nga nagpadayon sa pagpalig-on sa police visibility, regular nga school visits, ug pakigtambayayong sa mga school authorities aron masiguro ang usa ka malinawon ug luwas nga palibot alang sa pagkat-on.
Pinaagi sa panaghiusa sa lokal nga kagamhanan, kapulisan, sektor sa edukasyon, ug komunidad, nagpadayon ang lalawigan sa pagtukod og luwas, malinawon, ug lig-on nga palibot alang sa matag estudyante ug magtutudlo.
