Nisupak ang kanhi Court Sheriff nga si Abe Andres human siya nalakip sa listahan sa mga saksi nga ipresentar sa impeachment trial batok kang Vice President Sara Duterte.
Si Andres ang kanhi court sheriff nga nahimong headline human siya gisumbag ni Sara Duterte sa dihang mayor pa kini sa Davao City.
Sa usa ka post niadtong Biyernes, Hunyo 26, si Andres miingon nga dili na siya angay nga malambigit sa bisan unsang butang nga may kalabotan sa “partisan politics.”
Gipahinumdom usab niya nga siya karon nagserbisyo isip Human Resource Management Officer sa Korte Suprema ug isip usa ka second-level nga opisyal, angay lang nga magpabilin siyang neutral sa mga butang nga may kalabotan sa politika.
Sumala ni Andres, dugay na niyang gipili nga dili mohatag og bisan unsang pamahayag bahin sa insidente nga nahitabo kaniya, ug nga ang mga report sa media bahin niini igo na.
Base sa pre-trial brief nga gisang-at sa House prosecution panel, si Andres usa sa walo ka mga saksi nga gilauman nga motestigo kalabot sa mga alegasyon batok kang VP Sara, lakip na ang giingong mga hulga sa kinabuhi nila ni Presidente Ferdinand Marcos Jr., First Lady Liza Araneta-Marcos, ug kanhi House Speaker Martin Romualdez.
Sumala sa prosekusyon, ang testimonya ni Andres importante aron suportahan ang ilang argumento nga ang bise presidente makahimo sa paggamit og kapintasan.
