MANDAUE CITY, CEBU- Giila ni Mandaue City Mayor Thadeo Jovito “Jonkie” Ouano nga ang pabalay nagpabiling labing dakong hagit sa dakbayan tungod sa nagkadako nga panginahanglan alang sa relocation sites samtang nagpadayon ang paspas nga urbanisasyon ug limitado ang luna alang sa kalambuan.
Matud sa mayor, bisan pa sa nag-unang mga isyu sama sa trapiko, flood control projects, ug siguridad sa publiko, ang pagpangitag dugang pabalay alang sa mga residente maoy usa sa labing prayoridad nga gihuptan sa administrasyon.
Sigon ni Ouano, nagpadayon ang siyudad sa pagpalapad sa socialized housing program pinaagi sa pagtukod og mga residential buildings sa Barangay Tipolo.
Nakigtambayayong usab ang Mandaue City sa 4PH Housing Program sa nasudnong gobyerno aron mapahimuslan ang limitadong luna pinaagi sa pagtukod og mga vertical housing projects nga makatubag sa nagkataas nga panginahanglan sa pabalay.
Gipadayag usab sa mayor nga daghang residente ang mas gustong magpabilin sa Mandaue City bisan adunay mga kapilian nga relocation sites sa ubang lugar, hinungdan nga gipalig-on sa siyudad ang mga programa aron masiguro nga adunay igo ug angay nga pabalay sulod mismo sa dakbayan.
Dugang ni Ouano, nangandam ang siyudad alang sa umaabot nga mga imprastraktura pinaagi sa pagtinguha nga madugangan ang budget ngadto sa P5 bilyon sa sunod tuig.
Gipadayon usab sa lokal nga kagamhanan ang public-private partnerships (PPP) aron makahatag og dugang kita nga magamit sa mga prayoridad nga programa sama sa pabalay, panglawas, edukasyon, ug uban pang mga proyektong magpalambo sa serbisyo alang sa katawhan.
