Malampusong naluwas ang usa ka bata ug duha ka 11 anyos sa mga international rescue team gikan sa mga nahugno nga building sa Venezuela, pipila ka adlaw human sa duha ka kusog nga linog nga miigo sa nasud.
Usa ka video nga gipaambit sa US State Department nagpakita sa pagluwas sa usa ka bata nga milagrosong nabuhi gikan sa ilawom sa nahugno nga building.
Naluwas usab sa usa ka rescue team gikan sa Colombia ang usa ka 11 anyos nga batang lalaki nga nakit-an nga nalubong og halos tulo ka metros ubos sa mga debris.
Nabali ang iyang bukton ug gidala dayon siya sa ospital, apan wala maluwas ang iyang inahan ug igsoon sa maong katalagman.
Samtang, laing 11 anyos nga batang lalaki ang naluwas sa rescue team gikan sa Mexico sa lungsod sa Caraballeda.
Sumala kang Interim President Delcy Rodríguez, misaka na sa 1,430 ang kumpirmadong namatay, samtang kapin sa 3,000 ang nasamdan ug halos parehas nga gidaghanon sa mga residente ang nagpabilin sa mga evacuation center.
Giingon usab ni Rodríguez nga gihunong na sa mga rescue team ang search operations sa pipila ka lugar human walay nakit-ang timailhan sa mga posible pang naluwas ilalom sa mga debris.
Samtang, ang European Union naghatag og gibana-bana nga €5 milyon nga emergency assistance, ug gilauman usab nga mopahibalo ang Estados Unidos og dugang nga pondo aron suportahan ang mga apektadong komunidad.
