Gideklara sa World Health Organization (WHO) ang katapusan sa hantavirus outbreak nga nalambigit sa usa ka cruise ship human ang katapusang na-expose sa virus nakakompleto sa quarantine ug nag-negatibo sa test.
Sumala sa WHO, 13 ka tawo ang nataptan ug tulo ang namatay sa outbreak nga konektado sa Andes virus, usa ka talagsaong hantavirus nga kasagarang makita sa Argentina ug Chile.
Nagsugod ang insidente human mibiya ang MV Hondius cruise ship sa Argentina niadtong Abril 1.
Sa misunod nga mga semana, natala ang mga kaso ug gibutang sa quarantine ang mga pasahero ug tripulante.
Walay bag-ong kaso human sa quarantine period, mao nga opisyal nga gideklarar sa WHO nga tapos na ang outbreak.
Ang hantavirus mapasa gikan sa mga ilaga pinaagi sa ihi, hugaw, o laway, ug mahimong hinungdan sa grabe nga sakit sa baga.
