Giinsistir sa Malacañang nga si Bise Presidente Sara Duterte angay mohatag og ebidensya kabahin sa giingong Oplan Romanov nga gikutlo sa iyang kampo isip katin-awan sa iyang pamahayag batok kang Presidente Ferdinand Marcos Jr.
Sumala ni Palace Press Officer Undersecretary Claire Castro, gihatagan ang Bise Presidente og higayon nga mosumite og impormasyon human misulat kaniya ang National Bureau of Investigation (NBI) kabahin sa giingong mga hulga sa kamatayon batok kaniya ug sa iyang pamilya, apan wala kuno siya motubag.
Dugang ni Castro nga ang gobyerno dili maka-imbestiga sa bisan unsa kung walay igong detalye o ebidensya nga gipresentar kabahin sa giingong operasyon.
Gipasiugda usab sa Malacañang nga ang pagka-inahan o miyembro sa pamilya dili mahimong gamiton nga pasangil aron i-justify ang mga hulga batok sa Presidente.
