Gibasura sa Office of the Ombudsman ang kaso nga gisang-at batok kang Department of Public Works and Highways (DPWH) Secretary Vince Dizon kalabot sa pagtukod og mga pasilidad atol sa 2019 Southeast Asian (SEA) Games tungod sa kakulang sa ebidensya.
Sumala ni Assistant Ombudsman Mico Clavano, ang pagbasura sa kaso nalakip sa hiniusang resolusyon nga gi-isyu niadtong Disyembre 2021 human nakita nga walay igong ebidensya batok kang Dizon.
Ang pahayag migawas human sa pahibalo ni National Bureau of Investigation (NBI) Director Melvin Matibag nga ang ahensya nag-imbestiga sa giingong mga anomaliya sa bidding ug funding sa mga proyekto sa 2019 SEA Games, ilabina ang New Clark City Sports Complex, basi sa bag-ong impormasyon nga migawas.
Bisan pa, si Palace Press Secretary Claire Castro miingon nga si Dizon giimbestigahan na ug hingpit nga giabswelto.
