Midangop sa sibyaanan sa Bombo Radyo Cebu, si Atty. Charlemagne Cuevas, usa sa mga legal representative nga miduso sa pagdili sa pagputol sa mga Century Old Trees nga anaa nahimutang sa Poblacion sa Oslob, partikular na sa pampublikong plaza sa lugar.
Matud ni Cuevas nga ilang gipadangat ilang kahasubo ug kusganong pagbabag sa pagpamutol sa maong mga punoang kahoy nga gilangkoban sa 10 ka mga kahoy sa tugas ug Acasia nga nagbarug sa karaan nga Munisipyo sa lungsod sa Oslob.
Sigon niini nga ang mismong mga kahoy nga gisugdan na pagputol, gibana-banang anaa na sa 100 ka tuig na nga nagbarug sa lugar ug matud pa, putlon kini gumikan sa gikatakdang pagpatukod sa proyekto nga Sports and Cultural Center.
Gikuwestiyon ni Cuevas ang pagpatukod sa bag-ong Sports and Cultural Center nga aduna namayy functional nga Covered Sports Complex kaniadto, dugang pa niini nga kung mahinungdanon ang pagpatukod sa maong proyekto mamahimo ra kining itukod sa laing luna ug dili sa pampublikong plaza.
Hagit sa grupo ni Cuevas ang pagtigom og pirma sa mga residente ug sa kinatibuk-ang Oslobanon sa mga mobabag sa mismong pagpaputol sa mga Century Old Trees, lakip sa mga gipangita niini ang pagpamatuod nga adunay public hearing nga nahitabo alang niini.
Gihimug-atan usab sa abogado, nga bisan pa og aduna kini pagtugot sa DENR dili pasabot nga sakto ang pagpamutol og kahoy hilabi na kung dugay na kining nagbarug sa lugar.
Nanawagan usab kini ngadto sa publiko lakip na ang kagamhanan sa Dakbayan sa Sugbo, nga unta hatagan sila ug higayon sa pagpadayag sa ilang baruganan lakip na ang pagbabag sa pagpaputol sa mga kahoy.
