Gikabutyag ni Engineer Oscar Tabada, kanhi Regional Director sa PAGASA Visayas, active ang Habagat ug Southwest Monsoon, diin mao ang rason sa nasinati nga sagunson nga mga pag uwan-uwan sa Sugbo sukad pa sa miaging semana.
Atol sa eksklusibong pakighinabi sa Bombo Radyo Cebu kang Engr. Tabada, iyang dugang gipasabot nga laoman ug paaboton gihapon sa kasamtangan ang aktibong Habagat ug Southwest Monsoon sa kabisay-an, ilabi na nga adunay bagyo, nga gitawag nga tropical depression Kiyapo.
Matod niya, ang tropical depression Kiyapo anaa mahimutang sa Central Luzon, apan iyang giklaro nga hinay ra ni nga bagyo, pero wala niya gisalikway nga makadugang gihapon kini sa epekto sa Habagat.
Gikanayon usab ni Engr. Tabada nga adunay gibana-banang 100 barrels ang nabubo nga uwan kagahapon, ug kana nga gidaghanon, sulod lang sa 4 ka oras nga pagbundak sa uwan.
Sa maong gidaghanon sa tubig-uwan, gibutyag niya nga nalukop niini ang Metro Cebu, diin matod niya, ma obserbaran nga tungod sa kakusog sa uwan, miresulta kini sa pagbaha sa nagkadaiyang parte sa Sugbo.
