Naapektuhan ang kapin sa 300 ka pamilya sa pagbaha sa SOCCSKSARGEN ug Zamboanga City tungod sa kusog nga ulan nga gipahinabo sa Habagat nga gipakusog sa Bagyong Kiyapo.
Sa Barangay Calumpang, General Santos City, mibaha ang suba human sa walay hunong nga pag-ulan, nga nakaanod sa bahin sa usa ka balay ug usa ka kahoy.
Usa usab ka lalaki ang nadala sa kusog nga sulog sa dihang misulay siya og tabok sa suba.
Sa Sarangani, daghang mga balay ang nabahaan ug naanod, samtang nadaot usab ang Aquino Bridge sa Glan ug usa ka bahin sa dalan sa Barangay Kyo-gam.
Ang taytayan nga nagkonektar sa Malapatan ug Glan gisirado usab tungod sa kadaot nga dala sa baha.
Base sa inisyal nga datos sa Provincial Disaster Risk Reduction and Management Office (PDRRMO), anaa sa 314 ka pamilya ang mibakwit ngadto sa nagkalain-laing evacuation centers sa Sarangani.
Sa Sultan Kudarat, ang baha miabot hangtod sa hawak sa Barangay Caridad, Lambayong, samtang usa ka bahin sa Arakan-Davao Road sa Cotabato gisirado tungod sa landslide.
Naapektuhan usab sa pagbaha ang daghang mga motorista sa Zamboanga City.
Sumala sa PAGASA, ang padayon nga pag-ulan sa daghang bahin sa Mindanao gipahinabo sa Habagat nga gipakusog sa Bagyong Kiyapo.
