Miabot na sa kinatibuk-ang P19.065 trilyon ang utang sa gobyerno sa Pilipinas sa katapusan sa Hunyo, sumala sa Bureau of the Treasury (BTr).
Kini mas taas sa P518.98 bilyon kon itandi sa P18.546 trilyon sa katapusan sa Mayo, ug mas taas usab kaysa sa P17.267 trilyon nga natala niadtong Hunyo sa miaging tuig.
Sumala sa BTr, ang 2.8 porsyento nga pagtaas sa utang tungod sa mas dako nga pagpangutang sa gobyerno, sa sulod ug gawas sa nasud, aron pondohan ang mga programa sa kalamboan.
Ang mas lig-on nga peso nakatabang sa gamay nga pagpakunhod sa pagtaas sa kinatibuk-ang utang.
Ang utang sa sulod sa nasud miabot og P12.837 trilyon. Kini 2.74 porsyento nga mas taas kaysa sa Mayo ug 7.43 porsyento nga mas taas kaysa sa parehas nga panahon sa miaging tuig. Kining tanan gikan sa mga government securities.
Sa parehas nga panahon, ang gobyerno nakatala usab og net issuance sa mga government securities nga P342.93 bilyon, samtang ang kantidad sa onshore dollar bonds mikunhod og P0.60 bilyon tungod sa pagkusog sa peso.
Samtang, ang utang panggawas miabot sa P6.227 trilyon, misaka sa P176.66 bilyon gikan sa P6.051 trilyon sa katapusan sa Mayo. Kini tungod sa dugang nga pagpangutang gikan sa gawas sa nasud nga katumbas sa P223.11 bilyon.
