Gipahibalo ni Israeli Finance Minister Bezalel Smotrich nga naggahin ang gobyerno og 113 milyones ka shekels o kapin 37 milyones dolyares o bugti sa kapin 370-bilyones pesos aron mapalig-on ang kontrol sa kapin 70 ka makasaysayanong lugar nga gi-ukupahan sa West Bank.
Ang maong pondo gi-aprubahan sa usa ka steering committee sa gobyerno ug kabahin sa mas dako nga plano nga nagkantidad og 250 milyones ka shekels nga giuyonan niadtong Mayo aron ma-angkon ang mga archaeological sites sa West Bank, Jordan Valley ug uban pang lugar.
Dugang pa niini, nakadawat usab og dugang pondo ang Settlements Ministry alang sa maong programa.
Sa laing desisyon sa maong adlaw, gi-aprobahan usab sa Finance Committee sa Knesset ang hapit 300 milyones ka shekels nga dugang pondo alang sa Settlements Ministry.
Dugang ni Smotrich, ang maong lakang usa ka pinakataas nga Zionistang buhat, ug naglakip sa pagtukod og mga visitor center ug research facilities sa maong mga lugar.
Gi-ila sa Israel ang mga lugar isip bahin sa Jewish heritage samtang padayon niini nga gipalapdan ang kontrol sa mga yuta ug kabtangan sa mga Palestinian.
