Padayon nga nagdan-ag ang Filipino pole vault star nga si EJ Obiena human niya nalangkat ang iyang ika-pitong bulawang medalya karong season sa International Stabhochsprung Meeting sa Jockgrim, Germany.
Malampuson nga nalabwan ni Obiena ang 5.83 metros aron makuha ang kampeonato, pipila lang ka adlaw human niya usab madaog ang Halberstadter Hohenflug.
Gipildi ni Obiena si Siefeldin Abdelsalam sa Qatar pinaagi sa countback human silang duha nakalabwan sa 5.83 metros.
Samtang, nakuha ni Ersu Sasma sa Turkey ang bronze medal human niya malabwan ang 5.77 metros sa 12 ka atleta nga kompetisyon.
Human niya maselyohan ang kadaugan, gisulayan ni Obiena nga malabwan ang 5.93 metros aron ma-record ang iyang bag-ong season-best, apan wala kini mag-malampuson.
Giangkon sa Filipino Olympian nga dili sayon ang kompetisyon tungod sa pipila ka problema atol sa iyang warm-up.
Bisan pa niini, nagpabilin siyang malipayon ug kontento sa iyang performance ug resulta sa maong kompetisyon.
