Kung kaniadto libre ra ang pag-chismis, karon sa Barangay Landan sa Polomolok, posibleng P1,000 na ang bayad sa unang paglapas!
Kini human gipasa sa Barangay Landan ang Anti-Gossip Ordinance aron pugngan ang makadaot nga tsismis ug pagpakaylap og mga istoryang walay klarong basehanan nga sagad mahimong hinungdan sa away sa mga silingan.
Sumala ni Barangay Kagawad Joey Salazar Minggito, author sa Barangay Ordinance No. 8, Series of 2026, daghang reklamo sa barangay ang nagsugod sa mga istoryang gipasa-pasa hangtod nga nahimong dakong panagbangi.
Matud pa niya, daghan na kaayong oras ang mausik sa mga barangay opisyal sa paghusay sa mga away nga mahimo unta malikayan kung dili dayon i-marites ang nadunggan sa silingan ngadto sa laing silingan, nga na connect na nga murag wifi.
Suportado usab kini sa pipila ka residente tungod kay ang tsismis, gawas sa pagdaot sa dungog, mahimong makaguba sa panaghigalaay, relasyon sa pamilya ug maayong panag-uban sa mga silingan.
Ubos sa maong ordinansa, ang unang malapas multahan og P1,000, samtang P1,500 ang silot sa ikaduhang paglapas.
Mahimo usab nga pahimuon og public apology sa social media ang mapamatud-ang nakalapas.
Busa, sa Barangay Landan, murag kinahanglan na gyud nga maghunahuna kaduha una mosulti—kay basin ang imong “teh, ayaw isaba ha…” mahimong P1,000 nga istorya!
