Gitugyan sa House Prosecution panel ang desisyon o diskresyon bahin sa dungan nga pag-uswag sa kaso sa impeachment ug kasong kriminal batok kang Bise Presidente Sara Duterte ngadto sa Senate Impeachment Court.
Matud ni House Legal Spokesperson Benjamin Tolosa Jr., nga kini usa ka ‘dangerous precedent’ alang sa mga impeachable official kung ang impeachment complaint ug ang kasong kriminal batok sa bise presidente nag-uswag sa samang higayon tungod kay ang ubang mga impeachable official sama sa Presidente, Ombudsman, mga mahistrado sa Korte Suprema, ug uban pa mahimo usab nga kasuhan ug pasakaan og kaso sa samang higayon.
Dugang ni Tolosa, gitugyan sa House panel ang desisyon sa lokal nga korte ug sa impeachment court kung paboran ba ang kampo ni VP Sara nga dili ipadayon ang kasong kriminal tungod kay nagpadayon pa ang impeachment complaint.
Apan, gihingusgan sa kampo ni Vice President Sara Duterte nga dili mamahimong ipailawom sa criminal prosecution o pasakaan og kasong kriminal ang usa ka bise presidente samtang anaa pa kini sa katungdanan.
Sumala sa kampo ni Duterte, adunay mga legal nga basehan nga nag-ingon nga ang usa ka naglingkod nga bise presidente adunay proteksiyon batok sa criminal case samtang nagpadayon pa ang iyang termino.
Gipaklaro usab sa kampo nga kinahanglan respetohon ang mga probisyon sa Konstitusyon ug ang hustong proseso sa balaod sa bisan unsang lakang batok sa bise presidente.
Kini nga posisyon mitumaw taliwala sa mga kasong giatubang ni Duterte ug sa padayong diskusyon bahin sa iyang legal nga kahimtang isip naglingkod nga bise presidente.
