Nanawagan si Department of Health (DOH) Secretary Edwin Mercado atol sa iyang pagbisita sa Day Care Center sa Barangay Banilad, Dakbayan sa Mandaue, diin iyang gihangyo ang mga Sugboanon nga dili magduhaduha o mahadlok sa pagpabakuna.
Gipasiugda sa kalihim nga subay sa datos ug mga pagtuon, ang bakuna luwas ug dako og ikatabang sa paghatag sa labing taas nga benepisyo ug kagawasan gikan sa sakit-sakit.
Gipasabot usab ni Sec. Mercado nga ang katawhan nga nagpabakuna kaniadto pa sa ilang pagkabata maoy buhing ebidensya o living proof nga nakatabang kini aron magpabiling himsog ug mas produktibo sa matag miyembro sa katilingban.
Aron mapalig-on pa ang pagsalig sa publiko, ang kalihim miingon nga ang kampanya gisuportahan sa mga lokal nga opisyal, mga technical experts gikan sa DOH central office, mga representante gikan sa Research Institute for Tropical Medicine (RITM), ug mga miyembro sa akademya nga nagpamatuod usab sa kaluwasan sa bakuna.
Dugang pa niini, gipasalig sa kalihim nga andam ang mga doktor ug ang mga buhatan sa panlawas, sama sa City Health Office (CHO), Municipal Health Office (MHO), ug mga pampublikong ospital, andam nga mopasabot ug motubag sa bisan unsang mga precautions ug pangutana gikan sa publiko.
Subay niini, nakigtambayayong usab ang DOH sa probinsya sa Sugbo pinaagi ni Cebu Governor Pamela Baricuatro aron mas palapdan ug palig-unon pa ang maong kampanya sa pagpabakuna kauban ang nagkalainlaing lokal nga kagamhanan ug mga chief executive sa tibuok rehiyon.
