Mibwelta si Davao City 1st District Representative Paolo “Pulong” Duterte kang private prosecutor Atty. Lorna Kapunan human niya giingong gilambigit ang pamilyang Duterte sa insidente sa pagpamusil sa Ateneo de Zamboanga University (AdZU) niadtong Martes, Agosto 18.
Kini gikan sa pamahayag ni Kapunan nga naghisgot sa mga alegasyon bahin sa giingong mga assassins nga mabayran lang sa kantidad nga P5,000, ug nakapangutana kung ang krimen nahimo na bang kabahin sa kultura sa nasud.
Pinaagi sa usa ka post sa Facebook niadtong Miyerkules, Agosto 19, gipanawagan ni Duterte si Kapunan nga ihunong na ang pagpakalap sa mga isyu batok sa ilang pamilya ug gitawag kini nga “Marites ng impeachment.”
Gipasabot sa kongresista nga dili angay gamiton ang trahedya sa AdZU aron ipamugos na usab ang mga alegasyon batok sa pamilyang Duterte, samtang iyang gipadayag nga usa kini ka seryosong krimen nga gikinahanglang imbestigahan ug patubagon ang mga responsable, imbes nga himuon na usab nga “impeachment propaganda.”
Gidugang pa ni Duterte nga ang bugtong obligasyon sa mga abogado mao ang pagpresentar og lig-ong ebidensiya ug dili ang pagpangita og bag-ong kontrobersiya sa matag higayon nga may mahitabong trahedya.
Gawas niini, gisaway usab sa maong opisyal ang Akbayan Party-list tungod sa ilang padayong mga pamahayag batok kang Vice President Sara Duterte ug sa ilang panawagan nga padalian ang impeachment trial niini sa Senado.
