Gilibkas na ni Dumanjug Mayor Gungun Gica ang pagdili sa mga estudyante sa pagdala og cellphone sa mga eskwelahan tungod kay matod niya, nausab ang iyang hunahuna human sa insidente sa pagpamusil sa Zamboanga, ang usa sa mga insidente karong tuiga nga nakahatag og seryosong kabalaka sa kaluwasan sa mga bata.
Gipasabot sa alkalde nga ang orihinal nga rason sa pagdili sa cellphone mao ang pagpauswag sa literacy ug reading comprehension sa mga estudyante. Apan taliwala sa mga hulga sa seguridad, iyang gipahayag nga ang kinabuhi sa matag tawo mas gipabilhan ug importante.
Tungod niini, gitugotan na pag-usab ang mga estudyante nga makadala og cellphone sa tunghaan aron magamit sa panahon sa emergency.
Apan nausab na ang polisiya: gidili ang paggamit og cellphone sa tibuok oras sa klase, lakip na ang recess ug lunch break, gikan sa pagsugod hangtod sa katapusan sa klase.
Dugang niya nga ang mga cellphone dili kompiskahon. Hinuon, giawhag sa mayor ang mga magtutudlo ug mga prinsipal nga magbutang og mga basket, o kahon sulod sa classroom aron ang mga cellphone matipigan ug matago samtang nagpadayon ang mga klase o atol sa class hours.
Aron masiguro ang kaluwasan sa mga eskwelahan, gipahayag usab ni Mayor Gica nga iyang doblehon ang paningkamot pinaagi sa pagbisita sa mga eskwelahan ug pagpahigayon og mga safety drills uban sa PNP ug MDRRMO.
