Sugdan sa Department of Education (DepEd) ang pagpahigayon og mga active-threat drills sa mga eskwelahan sa tibuok nasud sa Agosto 25.
Diin ang drill mosulay kon unsaon pagdali sa pagtubag, pagbakwit ug “reunite” sa mga estudyante uban sa ilang mga pamilya kon adunay “human-induced threat” o hulga nga gipahinabo sa tawo.
Ang drill magamit sa mga leksyon nga nakat-unan gikan sa bag-ohay nga mga pagpamusil sa eskwelahan sa Tacloban ug Zamboanga City.
Atol sa hearing sa Senado, si DepEd USec. Malcolm Garma, miingon nga ang departamento nag-finalize na sa mga protocol nga ipatuman sa drill kauban ang Philippine National Police (PNP) human sa inisyal nga pagsulay niini sa Manila Science High School.
Dugang pa niini nga ang dakong bahin sa mga drills mao ang gitawag nga “reunification” stage diin ang mga estudyante, ginikanan, medical responder ug pulis moadto sa gitudlo nga mga lugar imbes nga magtapok nga nagkagubot sa palibot sa eskwelahan.
Gipahibalo usab sa DepEd nga ang pagbansay sa Agosto 25 magtugot sa mga opisyal sa eskwelahan sa pagtimbang-timbang kon unsaon paglihok sa mga protocol sa lebel sa tunghaan ug pag-ila sa mga kakulangan nga kinahanglan sulbaron sa dili pa ipatuman ang sistema.
